OK: Lindi, Äugi, Gegi
Teilnehmer:
Text: Lindi
Tessin, 17. Juni 2001
Besammlät häm mer üs widär ämol uf äm Liga-Parkplatz. Leidär hät sich scho am Afang vo üsäm Usflug diä erscht Värschpötig igschlichä!! Noch erschtä chlinä Umschtelligä im Abholplan isch äs dänn Richtig Rhiital gangä!! Im Heidiland hät s'OK dänn au alli acht agmeldätä Teilnehmer chönä begrüssä! Näbscht äm Polizischt Neffäl, händ au dä Pepi, dä Schpeedy, dä Boni und d'Pfuusbackä Hagi sich bereit erklärt, das Abentüür mit üs z'beschtrittä!!
Gschtärkt mit Sändwich, Glace und andärä feinä Koschtlichkeitä hät's üs dänn endgültig Richtig Südä zogä!! Uebär dä San Bernardino dur s'schöni Mesocco hät üsäs nöchschti Ziil Ascona gheissä. Z'Fuäss übär traumhafti Hauptschtrossä sind mer uf diräktäm Wäg zor Talschtation vo dä Funicolare Madonna del Sasso gschtolpärät!! Ohni Pausä sim mer mit dä Luftseilbahn uf dä Monte Cimetta "gflogä"! Dä mittlärwilä doch schtarchi Rägä hät d'Wandärig zo üsäm Nachtquartiär vorerscht värhindärät! Do isch üs nüt andärs übrig blibä als üs i dä warmä Gaschtschtubä vom Bärgreschtorant än erschtä Schlummärbächär z'neh!!
Dä Drang zom Nachtlagär isch gross gsi und noch einähalb Schtund Pausä sind mer trotz schtärchschtäm Rägä Richtig Basislagär g'wandärät!! Voll värschiffät händ mer noch ärä knappä Schtund wandärä s'Samschtigsziil erreicht. Polenta, Conillio und Grogonzola vom Feinschtä isch uf dä Schpiischartä gschtandä! Dä feini Merlot us dä Liitärbudlä hät üsärä Schtimmig kein Abbruch tuä!! Noch füf Schtund Italienisch Untärricht dur dä Aeugi isch äs dänn Ziit gsi för dä nöchschti Hohepunkt!! D'Buuchnabäl Foti för dä Sön-Schein-Club Zuäsatzwettbewerb isch agschtandä!! Meh odär wenigär früä sind mer dänn alli mit viil Rücksicht uf diä bereits schlofänd Gsellschaft au go liggä!!
S'Wättär am Sonntig hät jo alli us dä Sockä ghauä!! Schtrahländ blauä Himmäl und ä traumhafti Ussicht uf dä Lago Matschore händ üs för dä Rägä vom Samschtig meh als entschädigät!! Mit äm Z'Morgäbuffee im Magä hät's dänn Abschiid neh gheissä!! Aes sind tusig drü Hundärt Höhämetär Chnüüschlottäri vor üs gschtandä!! Nöd alli händ diä Usäfordärig agnoh und sind mit äm Bähnli abwärts gfahrä!!
Mit erhobänäm Haupt noch sonärä härtä Tuuur händ d'Wandärär im Tal au diä fuulä Säck widär troffä und s'gemeinsami Mittagässä isch uf äm Programm gsi!! Aaschlüssänd häts üs widär heiwärts zo Frau und Chind zogä!! Aem drohändä Schtau sind mer mit dä idüllischä Fahrt übär dä Lukmaniär usgwichä!!
Völlig gschafft und gsättigät vo dem aaschpruchsvollä und erläbnisrichä Wuchänänd sind alli no mit letschtär Chraft vo üsnä Schofförä Hei brocht wordä!!!! Aen bsundärä Dank gilt dänn au äm Raser Neffäl und notürli au äm Lolli-Pop Hagi (3 Lolli-Pop's pro Baggätäschä)! Si händ üs sichär dur dä Schwiizär Värchehrs-Dschungäl brocht und sind doch aanöhärnd 600 km Autofahrt s'ganzi Wuchänänd för üs umäg'kurvt!!!
Im Namä vom ganzä OK (Aeugi, Gegi, Lindi)
dä Lindi
