OK: Gegi, Fix, Lindi
Teilnehmer: SSCler
Text: Lindi
Nochdäm diä eintä früänär, diä andärä schpötär, diä letschtä sogar z'schpot am Träffpunkt acho sind hät s'OK än churzä Abriss öbär diä nöchschtä zwei Täg abgehh. Erschtä obligatä Ziilpunkt bi Reisä zo dä Schteibock-Tschinggä isch notürli s'Heidiland gsi, wo mer üs au chräftig för's bevorschtehändi Ädväntschär-Wuchänänd gschtärcht händ! Ufgrund vom wahnsinnig dränggtä Programm händ mer üs scho noch churzär Ziit widär müäsä loslösä und sind noch ämänä schnällä Zwischähalt uf dä Albula Passhöhi diräkt noch Sankt Moritz Bad witärgreist. Im bekanntä Boom-Sport händ mer 9 Mauntän-Baick chönnä abholä. S'zähti hät s'OK no d'Silvaplana churzfrischtig müäsä organisiärä.
Vor äm Mittag isch äs dänn endli so richtig losgangä und dä erschti Höhepunkt, dä Ufschtig uf "d'Alp da Staz" hät scho uf üs gwartät. Mit meh und wenigär Müä händs alli gschaft! D'Abfahrt zom Lej da Staz, au bekannt vom Engadinär Schimaraton, hät höchschti Afordärigä a d'Konzentration gschtellt! Suverän und ohni au nu dä chlindschti Väschtürär händ mer s'Zmittagässä i romantischär Umgäbig vom Stazärsee chönä zuä üs nehh. Diä erschtä händ dänn au scho dä Angschtschweiss i dä Händ müäsä mit Iiss bekämpfä!!
Frisch värpflägt und vollär Tatädrang simär äm "Val Roseggtal" entgägä. Übär Schtock und Schtei, Bäch und Bruggä händ mer s'värdiänti Biär z'hindärscht, am Fuäss vom Rosegg-Gletschär dörä bschtelä. Uf äm Ruggwäg händ sich dänn diä erschtä Chrampfärschinigä bemärkbar gmacht!! Mit 2 Ma Värluscht händ mer dä schteili Ufschti vo Pontresina zrugg zom Stazärsee i Agriff gnohh. Mit letschtä Chräft hät s'übrigblibäni Fäld vo 8 Schpitzäfahrär dä Usgangsort erreicht, wo üs dä Mannschaftswagä mit Massasch und Füsio erwartät hät!
Z'Pontresina, im Hotäl "Alvetern" isch äs dän ums Bettärfassä gangä. Frisch duschät und gschtriglät hät üs dä Wäg zom Schteibock gfüärt. Vom urchigä Saal und äm sagähaftä Ässä schwärmät d'Augä, Gaumä und Mägä no hüt!! Dä Usgang müäs au än Hit gsi si, sind doch diä letschtä Lärmändä am viärtälvorviäri singäng und meh odär wenigär ziilschtrebig is Chörbli gheit.
S'Zmorgä-Büffe mit Chäs, Fleisch, Frücht, Gipfäli, Zopf, Gonfi, Honig, värschidänschti Müäsli, Milch, Kafi.... händ sich einigi übär ä Schtund übär sich ergoh loh!! Dä Rägä hät i dä Zwüschä-Ziit igsetzt und s'isch höchschti Iisäbahn wordä, üs uf dä nöchschti Gigg z'konzentriärä. Cross-Blades vom Banana-Schport händ sich sächs Unvärwüäschtlichi undär d'Füäs gschnallät. Minimscht gschützt isch äs bärgufwärts gangä..... Diä gfüärchtäti Savogninär Downhill-Schtrecki hät uf üs gwartät! Brutalschti Schtüärz und ungwollti, wildäschti Flüüg dur d'Luft händ mer chönä mitärläbä!!!
Noch äm Mittagässä hät's üs widär Richtig Heimat zogä. Dä Zwüschähalt im Kafi Abdärhaldä z'Wattwil hät dä Abschluss vo üsäm Giga-Wiikänd bildät. No uf Toggäburgär Bodä häm mer üs värabschidät und d'Fahrär händ ehri Schöfli no sichär Hei brocht.
Bis zom nöschtä Mol und beschtä Dank för Euäs Engagement und diä unvärgässlich Usgangs-Schtimmig.
s'OK mit äm
Gegi, Fix und Lindi
